Fariz Saleh oğlu Əhmədov 1983-cü ildə anadan olub. 1999-2003-cü illərdə Azərbaycan Dövlət İqtisad Universitetinin (UNEC) Biznesin Təşkili və İdarə Edilməsi (TUDİFAK) ixtisası üzrə bakalavriat təhsili alıb. 2003-2005-ci illərdə Türkiyənin Sakarya Universitetinin Sosial Elmlər İnstitutunda İdarəetmə və Təşkilatlandırma ixtisası üzrə magistratura təhsili alıb, 2006-2010-cu illərdə isə həmin universitetdə doktorantura təhsili alıb. "Azərbaycanın Milli Rəqabət Gücü: TOWS Matrisi və Almaz Modeli ilə Bir Analiz" mövzusunda dissertasiya işini müdafiə edərək iqtisad üzrə fəlsəfə doktoru elmi dərəcəsini alıb.

Elmi fəaliyyətinə Sakarya Universitetinin Sosial Elmlər İnstitutunda elmi işçi kimi başlayıb və şəhərlərin brendləşməsi sahəsində aparılan müxtəlif elmi layihələrdə iştirak edib.

Pedaqoji və idarəetmə fəaliyyətini Azərbaycan Dövlət İqtisad Universitetində (ADİU) davam etdirib. 2010-2014-cü illərdə ADİU-nun Türk Dünyası İqtisadiyyat Fakültəsində müəllim, baş müəllim, dosent və kafedra müdiri müavini, 2014-2017-ci illərdə isə Universitetin İqtisadiyyat və İdarəetmə kafedrasının müdiri vəzifələrində çalışıb. 2017-2023-cü illərdə ADİU-nun Beynəlxalq Magistratura və Doktorantura Mərkəzinin direktoru, 2023-2024-cü illərdə isə ADİU-da Elm və İnnovasiya məsələləri üzrə prorektor olub.

2016-cı ildə Azərbaycan Respublikasının Prezidenti yanında Ali Attestasiya Komissiyası tərəfindən dosent elmi adını alıb və Azərbaycan Respublikasının Prezidenti yanında Elmin İnkişafı Fondunun “2016-cı ilin gənc alimi” müsabiqəsinin qalibi olub. 2020-ci ildə Azərbaycan Respublikası Təhsil Nazirinin əmri ilə “Azərbaycan Respublikası qabaqcıl təhsil işçisi” döş nişanı ilə təltif edilib, həmçinin səmərəli elmi-pedaqoji və idarəetmə fəaliyyətlərinə görə ADİU-da fəxri fərmanlarla təltif olunub.

Dünyanın nüfuzlu elmi platformalarında (Web of Science, SCOPUS) indekslənən jurnallarda 10-dan çox, digər beynəlxalq elmi jurnallarda isə 40-dan çox elmi məqalənin müəllifidir. Həmçinin dünyanın müxtəlif ölkələrində keçirilən elmi konfranslarda 30-dan çox məruzə ilə çıxış edib. Bir çox nüfuzlu elmi konfransların və elmi jurnalların (Web of Science, SCOPUS, Econlit, və s.) elm və təşkilat komitələrinin üzvü və sədridir. 2019-cu ildə 9th International Conference on Lifelong Education and Leadership for All (ICLEL) konfransının sədri olub. O, həmçinin İqtisadiyyat və İdarəetmə sahəsində Tədqiqatçıların Beynəlxalq Elmi Konfransının (ISCEMR) təsisçisidir. ERASMUS, Mevlana və bir çox mübadilə proqramları ilə dünyanın bir sıra xarici universitetlərində mühazirələr oxumuş və staj keçmişdir.

“Strateji İdarəetmə”, “Tədqiqat Metodları” və “Biznesdə Strateji İdarəetmə”, “Keyfiyyət İdarəetmə Sistemi” adlı kitabların həmmüəllifi, Türkiyədə nəşr olunan “Ulusal Rekabet Gücü Teorileri ve Ölçülmesi” monoqrafiyasının müəllifi, “Qlobal İqtisadiyyatda Yeni İstiqamətlər”, “Türk Dünyasında Yeşil və Dönüşüm Ekonomisi: Geçiş İçin Yol Haritası” və “Exploring The Green Economy: Issues, Challenges, and Benefits” adlı kitabların elmi redaktoru olub. Bundan əlavə, “Qarabağ və Şərqi Zəngəzurun İqtisadi İnkişafında İnvestisiyaların Rolu”, “Qarabağ və Şərqi Zəngəzurun İqtisadi Potensialının Sektoral Qiymətləndirilməsi”, “Qarabağda Biznes Mühiti və Kiçik və Orta Biznesin İnkişafı”, “Rəqəmsal Marketinq və Sosial Media”, “Elektron Ticarət və Elektron İxracat”, “Bir Əsrin İqtisadi Portreti”, “Yaşıl İqtisadiyyat”, “Yaşıl İqtisadiyyat və Dayanıqlı İnkişaf”, “UNEC Elmmetrik Göstəricilər” adlı kitabların layihə rəhbəri və ideya müəllifidir. Həmçinin dünyaca nüfuzlu iqtisadçı alimlər Michael P. Todaro və Stephen C. Smith tərəfindən yazılmış “İqtisadi İnkişaf” kitabının 13-cü nəşrinin SOCAR Midstream Operations şirkətinin dəstəyi ilə Azərbaycan dilinə tərcüməsinin elmi redaktoru və layihə rəhbəri olub. O, həmçinin bir tədris metodiki vəsaitinin və 5 tədris proqramının müəllifidir. Azərbaycan Respublikası Elm və Təhsil Nazirliyinin dəstəyi ilə SABAH magistratura səviyyəsində Elektron Kommersiya ixtisası layihəsinin rəhbəri olub. 2022-2025-ci illərdə FD 1.11, 5302.01 - Ekonometriya, İqtisadi Statistika, 5303.01 - Mühasibat Uçotu, 5304.01 - İqtisadi Fəaliyyət Növləri, 5310.01 - Dünya İqtisadiyyatı dissertasiya şurasının sədr müavini olub.

Dünya Bankı, UNDP, Erasmus+ layihələri ilə yanaşı, Azərbaycan Respublikası Elm və Təhsil Nazirliyi, “SOCAR Midstream Operations”, Paşa Holdinq, BP, UNDP, Trendyol, KOBİA, Veysəloğlu şirkətlər qrupu və digər qurumlar tərəfindən dəstəklənən layihələrdə rəhbər və koordinator vəzifələrində çalışıb.

2024-cü ilin 29 iyul tarixində Azərbaycan Respublikası Elm və Təhsil Nazirliyinin müvafiq əmri ilə Qarabağ Universitetinin Elm və İnnovasiya məsələləri üzrə prorektor vəzifəsinə təyin edilib.